Auður og Unnar í Ástralíu

G´Day! How are you going?

Hvað segir fólk gott þá? Allir komnir með mottur, jafnt karlar sem konur þarna heima?

Við erum búin að vera rosalega hress og erum búin að skella okkur á þónokkuð marga tónleika undanfarið. Fórum saman á AC/DC, Auður fór á Whitney Houston með Kristbjörgu og svo eru þær vinkonurnar að fara á Lady GaGa síðar í mánuðinum (eða Lafði GóGó eins og Unnar kýs að kalla hana).

Við fórum svo líka á tónleika með Svavari Knút, íslenskum tónlistarmanni sem er þessa stundina að spila og ferðast í Ástralíu. Náðum að hitta hann og Veru kærustuna hans nokkrum sinnum og var það yfirleitt mikið fjör.

Inga Rós, Svavar Knútur og Vera

Við erum búin að hitta soldið mikið 3 íslenskar stelpur sem eru í læknisnámi hérna í Melbourne yfir smá tíma og er búið að vera gaman að fylgjast með þeim fá Ástralíu bakteríuna, við höldum að þær ætli sér bara allar að koma aftur, hvort að það sé allt okkur að þakka er ekki gott að segja en...

Við erum búin að vera í Ástralíu meira en 2 ár!! Búið að vera ekkert smá fljótt að líða og þýðir það að nemenda visað okkar er útrunnið, við höfum því verið að stússast í að sækja um nýtt visa sem að leyfir okkur að búa og vinna í Ástralíu næstu 18 mánuðina. Innifalið í þessu skemmtilega ferli var meðal annars að fara í læknisskoðun (með x-ray), löggu tékk og fleira skemmtilegt.
Hvað sem gerist svo eftir þessa 18mánuði er óráðið eins og er.

Melbourne búar fengu svo heldur betur að finna fyrir því um daginn einn laugardaginn, það var búið að vera snilldar veður um morguninn 20-25 gráður og sól en alltí einu um 3leytið þá verður rosalega dimmt þannig að Auður bendir mér á að ná í þvottinn úti á snúru sem ég geri (svo hlýðinn), 3 mínútum seinna fer rafmagnið af og 2 mínútum eftir það byrjar þetta hrikalega haglél að dynja á húsinu. Við höfum aldrei séð annað eins, þetta voru ís klumpar á stærð við stór jarðaber sem að dundu á húsinu í góðann tíma og það öflugt að við færðum okkur frá gluggunum af ótta við að þeir höndluðu þetta ekki. Svo byrjaði rigningin sem var eins og sturta í langan tíma og við ennþá rafmagnslaus. Þetta hætti svo jafnfljótt og það byrjaði en borgin var marga daga að jafna sig af skemmdum. "Versti stormur í hundrað ár" sögðu fréttirnar.

Við erum svo að fara í brúðkaup næstu helgi hjá stelpu sem var í sama námi og Unnar. Hún er frá Bandaríkjunum og hann er frá Ástralíu þannig að þetta verður áhugaverð reynsla. Þau eru með það takmark að hafa brúðkaupið sem umhverfisvænast og fleira í þeim dúr þannig að þau vilja t.d ekki gjafir heldur hvetja þau fólk til þess að styrkja einhver málefni (þannig að við erum búin að kaupa anda og kjúklinga hóp handa fólki sem þarf á því að halda), svo er kakan bökuð með fair trade hveiti og kjóllinn úr fair trade efni, borðskrautið verður blóm úr garðinum hjá henni í pottum svo að fólk getur tekið með sér heim... Nánari fréttir af þessu síðar.

Svona að lokum er smá Ástralskt slangur og fleira sem gott er að kunna ef maður rambar hingað niðureftir:

Mushies-Sveppir

Krissie: Jól

No worries mate: ekkert mál félagi

flat out like a lizzard drinking (oft stytt í flat out): mjög upptekinn

Goon: kassa vín (beljuvín sem kostar c.a $7 fyrir 4lítra)

Maccers: Macdonalds (blessuð sé minning hans á Íslandi)

A rippa'h: einhvað sem er rosalega flott (flott mark, gott tilboð)

Barby: Grill (ekki dúkkan)

Sheila: sæt stúlka (gella)

Pavement pizza: Æla

Söknum ykkar eins og alltaf.....og muna að kvitta fyrir sig takk fyrir!

Meira seinna

Unnar & Auður

P.S Í tilefni 2 ára Ástralíu dvalar okkar er komin skoðanakönnun til þess að svara og verða niðurstöðurnar birtar í næsta bloggi.